Э.Хосбаяр
Ерөнхий эрхлэгч
Улс төр
2022.07.02 23:02
8670
АРДЧИЛСАН НАМЫН 204 ҮҮРИЙН ДАРГА, ТЭРГҮҮЛЭГЧДИЙН ӨДӨРЛӨГ БОЛОВ

Өнөөдөр /2022.07.02/ Нийслэлийн 9 дүүрэг, 204 үүрийн дарга, тэргүүлэгч, гишүүдийн оролцсон "Ардчилсан өдөрлөг" зохион байгуулагдлаа. Өдөрлөгийн үеэр "Үндсэн хуулийн нэмэлт өөрчлөлтийн тухай" хэлэлцүүлгийг намын гишүүдийн дунд өрнүүлсэн юм. Өдөрлөгийг нээж Монгол Улсын тав дахь ерөнхийлөгч, Ардчилсан намын дарга Х.Баттулга үг хэллээ. Тэрээр хэлсэн үгэндээ, Ардчилсан намын үүрийн дарга тэргүүлэгч нарын уулзалт хэлэлцүүлгийг өнөөдөр ийнхүү зохион байгуулж байгаа нь цаг үеэ олсон үйл ажиллагаа юм. Ардчилсан нам анхан дунд шатны гишүүдээ сонсдог ГИШҮҮН ТӨВТЭЙ нам билээ. Гишүүн төвтэй хэмээх энэ үгний утга учрыг бид илүү тод томруунаар харах цаг нэгэнт болсон гэж үзэж байна. Намын шийдвэр нь зөвхөн дарга нарын шийдвэр байдаг биш анхан шатныхаа гишүүдийн санаа бодлыг үндэслэсэн хамтын шийдвэр байх нь манай намын нэн тэргүүний зорилгын нэг гэж БИ харж байна. Иймээс өнөөдөр нийгэмд хөндөгдөж буй олон асуудлууд, түүний дотор Үндсэн хуулийн нэмэлт өөрчлөлт нь зөв, буруу эсэх талаар эцсийн дүгнэлт хийхээс өмнө бид гишүүдээсээ асуух ёстой гэж үзсэн. Мөн 2024 оны УИХ-ын сонгуульд Ардчилсан намаас нэр дэвшигчдийн талаар Ардчилсан намын 21 аймаг, 330 сум, 9 дүүргийн гишүүдээс санал асуулга явуулах ажлыг Ардчилсан намын ХЭГ эхлүүлсэн байгаа.  Энэ бол Ардчилсан намаас анх удаа явуулж буй цаг хугацааны хувьд эртнээс намын гишүүддээ тулгаж биш тэднээс асуух замаар шийдвэр гаргах ГИШҮҮН ТӨВ-тэй Ардчилсан намын нэн чухал алхам болж байна гэлээ. Мөн өдөрлөгийн үеэр Ардчилсан намын Ерөнхий нарийн бичгийн дарга И.Мөнхжаргал хэлэхдээ, Ардчилсан намын даргын өгсөн үүрэг чиглэлийн дагуу би ажлаа хүлээж аваад 66 хоног өнгөрсөн байна. Энэ хугацаанд хамгийн түрүүнд 21 аймгийн 330 сумын Ардчилсан намын дарга нарыг нийслэл Улаанбаатар хотноо нэгэн дээвэр дор хуралдуулан цаг үеийн чухал асуудлуудаар нэгдсэн шийдэлд хүрсэн билээ. Бид тус хурлаар Монгол Улсын Дээд шүүхэд төдийгүй УИХ-ын гишүүд, ҮБХ-ны гишүүдэд намынхаа үйл ажиллагаанд идэвхтэй оролцохыг уриалсан шаардлагуудыг хүргүүлж, 330 сумын дарга нар бүгд гарын үсгээ зурж, тамгаа даран албажуулсан юм. Харин өнөөдөр бид нийслэлийн 9 дүүргийн 204 үүрийн дарга, тэргүүлэгчдийг урин хэлэлцүүлгийг өрнүүлж байна. Намын үйл ажиллагаа тасралтгүй тогтмол үргэлжилж, бид амралтын өдөр бүр Үндсэн хуулийн нэмэлт өөрчлөлтийн асуудлаар хэлэлцүүлгүүдийг хийж байна. Цуврал хэлэлцүүлэгт, Элчин сайд, гадаадын судлаачид, Монгол Улсын Ерөнхийлөгчийн Тамгын газрын дарга, УИХ-ын дарга байсан улс төрчид, Дээд шүүхийн дарга байсан шүүгч, хуульчид гээд бид нам харгалзахгүй сонсох ёстой гэсэн төлөөллүүд, судлаачид, улс төрчдийг урьж, уулзалт лекцийг зохион байгуулсаар байна.


Мөн энэ хугацаанд орон нутагт аймаг, сумдын ИТХ-ын гишүүдийн нөхөн сонгууль болж,  АН-аас 37 хүн нэр дэвшснээс,  15 нь ялалт байгууллаа. Монголын ард түмний Ардчилсан намд итгэх итгэл өнөөдрийг хүртэл бат оршсоор байгаад баяртай байна гэлээ. Түүний дараа 
Нийслэлийн Ардчилсан намын дарга Д.Пүрэвдаваа хэлэлцүүлэгт оролцогчдод хандан үг хэлэв. Тэрээр хэлэхдээ, Ардчилсан намын нийт гишүүддээ эв нэгдлийг эрхэмлэн аливаа тулгамдсан асуудлыг хоорондоо ярилцдаг байгаарай!  Хамгийн зөв шийдвэр бол хамтын шийдвэр юм хэмээн уриалж, хэлэлцүүлэгт оролцож буй нийт Ардчилсан намын гишүүддээ амжилт хүслээ. 


Хэлэлцүүлэгт оролцсон Ардчилсан намын үүрийн дарга гишүүд Үндсэн хуулийн нэмэлт өөрчлөлтийн асуудлаар байр сууриа мөн илэрхийллээ. Тэд үзэхдээ, Ардчилсан намаас Үндсэн хуулийн нэмэлт өөрчлөлттэй холбоотой цуврал хэлэлцүүлэг зохион байгуулж байгаа нь маш чухал. Үндсэн хуульд нэмэлт өөрчлөлт оруулах цаг нь болоогүй байна. Үндсэн хуулийн нэмэлт өөрчлөлтөд хүний эрх, эрх чөлөөний тухай асуудал хамгийн ил тод шийдэл байх ёстой ч их бүрхэг байна. Монгол Улс дарга нарын тоог нэмэх биш ажлын байрыг нэмэгдүүлэх ёстой. УИХ-ын гишүүдийн тоог нэмэх асуудлыг эсэргүүцэж байна хэмээн Баянгол дүүргийн Ардчилсан намын 4 дүгээр үүрийн гишүүн Н.Лут-Очир хэллээ. Ийнхүү гишүүн төвтэй Ардчилсан намын гишүүд рүүгээ хандсан үйл ажиллагаа үргэлжилж байна.
#Ардчилсан_нам_гишүүн_төвтэй_нам