Сонгинохайрхан дүүргийн 15, 16 дугаар хороо буюу нэгдүгээр хорооллын арын зам дагуух нийтийн эдэлбэр газарт байсан 477 гарааш, контейнерыг бүрэн чөлөөлж, 3.5 га талбайд тохижилт, бүтээн байгуулалтын ажлууд эхлээд нилээдгүй хугацаа өнгөрсөн. Тохижилтын ажил 8 дугаар сарын 15-ны өдөр эхэлсэн бөгөөд одоогийн байдлаар 60 гаруй хувьтай үргэлжилж байна.

Энэ удаагийн газар чөлөөлөлтийг объект эзэмшигч иргэд дэмжсэн бөгөөд уг талбайн бүтээн байгуулалтын зураг төсөлд оршин суугчдын санал хүсэлтийг хэд, хэдэн хувилбараар тусгасан ажилласан.

Тус талбайд:

• Автозам, пандус
• Явган зам
• Дугуйн зам
• Спорт талбай
• Тоглоомын талбай,
• Тайз
• Далан
• Ногоон байгууламж
• Ногоон байгууламж услах худаг гэх мэт тохижилт бүтээн байгуулалт зураг төслийн хүрээнд хийгдэж байна.

Сонгинохайрхан дүүрэгт нийтийн эдэлбэр газарт зөвшөөрөлгүй баригдсан гарааш, чингэлгийг Нийслэл, дүүргийн Засаг даргын захирамжийн дагуу 2021 оны 3 дугаар сарын 17 өдөр анх чөлөөлж эхэлсэн. Тухайн жил дүүргийн 17 дугаар хорооны 132 ширхэг гарааш, контейнерыг буулгаж, тус талбайд ногоон байгууламж, явган хүний зам, дугуйн замтай бүтээн байгуулалтыг хийж тохижуулж байна.

Энэ жилийн хувьд мөн адил гуравдугаар сард зөвшөөрөлгүй гарааш, контейнерыг чөлөөлөх ажлыг эхлүүлсэн бөгөөд иргэдээс ирсэн саналын дагуу бүтээн байгуулалтууд хороо тус бүрт хийгдэж байна.

Энэ онд Сонгинохайрхан дүүргийн хэмжээнд 60 байршилд 1559 ширхэг зөвшөөрөлгүй гарааш, контейнерыг чөлөөлөхөөр төлөвлөгөөнд тусгагдсан.

Энэ жилийн хувьд 15, 16, 18, 19, 27 дугаар хорооны 1200 гаруй гарааш, контейнерыг буулгаж тухайн газрыг нийтийн эзэмшилд шилжүүлэн бүртгэж аваад байна.