Д.Тунгалаг
Сэтгүүлч
Гадаад мэдээ
2022.10.03 10:51
180
Хятад улс хөдөө орон нутгаа хөгжүүлэх цогц бодлого авч хэрэгжүүлж байна

Нийт иргэдээ ядуурлаас ангижруулах зорилтоо биелүүлсэн Хятад улс эдүгээ хөдөө орон нутгийг хөгжүүлэх цогц бодлого авч хэрэгжүүлж байна. Зав чөлөө, завшаан тохиол таарвал зөвхөн хотод биш, хөдөө орон нутгаар нь аялбал Хятад орны өвөрмөц соёл , ёс заншил, жинхэнэ амьдрал ахуйтай нь танилцах боломжтой юм. Ургац хураалтын баян намраар Хятад улсад ажиллаж амьдарч буй гадаадын хүмүүс Хятадын хөдөө орон нутгаар аялсан дурсамжаасаа хуваалцлаа. Тэд нартай хамт аялахад бэлэн үү.

“Сайн байцгаана уу. Намайг Лүө Мань гэдэг. Францын хөдөөгийн хүн, Чүнчин хотод анх ирэхдээ би Хятадын хөдөө орон нутгаар нь аялахыг хүссэн. Тэд хир зэрэг амьдарч байгаа бол?Амьдрал ахуйдаа сэтгэл дүүрэн болов уу гэх зэргийн олон бодол өвөрлөж Фэнжед очсон юм.  ”

Лүө Мань энэ жил 26 настай, Сычуаны Гадаад хэлний их сургуулийн гадаад оюутан. Ноднин Фэнже сяниар аялжээ. Энэ сянь нь Чүнчин хотын төвөөс 380 гаруй километр зайтай. Галт тэрэг, нисэх онгоц байхгүй жижиг сянь ямар байдаг бол гэж сониуч бодолтой хүрсэн Лүө Мань сэтгэгдлээ хуваалцлаа:

“Фэнже том хоттой адил нэлээд хөгжсөн гэж харлаа. Өөрийн гэсэн брэнд бүтээгдэхүүнтэй, нутгийн захиргаанаас нь тосгоны оршин суугчдад тусламж үзүүлж, эдийн засаг нь улмаар хөгжиж байна. Надад их таалагдлаа”. 

Лүө Мань мөн Чүнчиний Бишань, Үүлүн, Сычуаны Я-Ань зэрэг олон газрын хөдөө тосгоноор явсан юм. Интернетэд холбогдсон тул цахим худалдаа, ложистик, гар утсаар төлбөр тооцоо хийх зэрэг орчин үеийн шинэ сонин зүйл хөдөө орон нутагт дэлгэрч, нутгийн тариаланчид цахим сүлжээгээр өөрийнхөө тарьж ургуулсан хөдөө аж ахуйн бүтээгдэхүүнээ шууд борлуулж байгаатай танилцлаа. Хөдөө орон нутгаар аялах сонирхолтой Лүө Мань тухайн нутгийн хөдөө аж ахуйн бүтээгдэхүүний брэндийг онцолсон бөгөөд үйлдвэр дээр нь очиж, үйлдвэрлэлийн загвартай нь танилцжээ.

“Үйлдвэр нь Франц, Германыхтай адилхан санагдлаа. Намайг очиход мөөгний чанамал үйлдвэрлэж байсан. Олон ажилчинтай, маш хөгжингүй, цэвэрхэн, нутгийн иргэдийг ажиллуулж, ажлын байраар хангадаг. Тэд энэ үйлдвэрээ авч явна. Хамтдаа хөрөнгөжих зорилготой. Ийм үйлдвэрлэлийн хэлбэр нь надад их таалагдлаа. Ингэснээр хот суурин, улс орон нь хөгждөг юм байна”.

Лүө Маньтай адил Хятадад сурч буй Бүгд Найрамдах Конго Улсын оюутан Гао Шян ноднин сургуулийнхаа зуны сургалтад хамрагдан, Хятадын хөдөө орон нутагт аялсан юм. Түүний очсон Хүнань мужийн Жанжяжегийн Жүмүган тосгон нь ядуувтар амьдралтай газрын нэг байжээ.

“Тэр тосгон ядуувтар байснаа саяхан ядуурлаас ангижирсэн гэх юм. Хөдөө гэхэд үнэмшмээргүй, одоо бол бүр зам тавиад, интернетэд холбогдчихсон, эмнэлэг сургууль гээд давхар байшингуудтай. Хятад улс ийм том газар нутагтай. Ямар аргаар хөдөө орон нутгаа ингэж хөгжүүлж чадав аа гэж гайхаад байна. Туйлын амаргүй ажил.”

Хятад улсад сурч буй Узбекистан оюутан Мө Ли: Ядууралтай тэмцэх асуудал мөн Узбекистаны ч гэсэн толгойны өвчин болчихоод байгаа. Хятад улсын туршлагаас суралцах ёстой гэж байлаа. Одоо түүний ярихыг үргэлжлүүлэн сонсоорой.

“Зарим тариаланчдад бизнесээ эхлүүлэхэд нь тусалж, маш сайн алим ургуулж, Засгийн газар нь хөдөө орон нутагт галт тэрэг нэвтрүүлсэн учраас алим болон бусад зүйлээ хотод аваачиж зарах боломжтой болсон байна. Ингэснээр тариаланчдын орлого нэмэгдэж, амьдрал нь сайжраад цаашид илүү их юм хийх хүсэлтэй болдог нь миний сэтгэлийг их хөдөлгөсөн. Хятадын ядуурлаас ангижруулсан ажил нь хөгжиж буй орнуудад үлгэр жишээ үзүүлсэн гэж харж байгаа. Узбекистан ядуурлыг бууруулах чиглэлээр Хятад улстай олон улсын хамтын ажиллагаа өрнүүлэхийг чухалчлах ёстой гэж бодож байна”.

Хөдөөгийн хүмүүсийн цайлган цагаахан сэтгэл, эгэл даруу зан араншин зэрэг нь  гүнзгий сэтгэгдэл төрүүлсэн тухай гадаадын аялагчид ярьж байлаа.  

Юньнаньд гэр буудал ажиллуулж буй Америк иргэн Линь Дэн өглөө бүр үүргэвч үүрч, өглөөний захаар очин, нутгийн иргэдтэй хууч хөөрдөг. Өөдрөг бодол, найрсаг сэтгэлтэй хөдөлмөрч түмнийг хүндэтгэдэг хэмээн тэрээр ярьж байлаа.

“Хятадын хөдөө орон нутагт тосгоны иргэд бүгд өөдрөг хүсэл тэмүүлэлтэй. Манай ажилчин, мужаан нарын хүүхдүүд нь ч бүгд их сургууль төгссөн оюутан. Тийм учраас одоогийн хөдөө орон нутаг, тэндэх хүмүүс том хотынхонтой адил эрэлт хэрэгцээ ихтэй, холын хүсэл мөрөөдөлтэй гэж би хувьдаа бодож байгаа”.

Сирийн араб хэлний багш Сагин Сайламад Хятадын хөдөөд найзууд бий. Амралтын өдрүүдэд Сагин Сайлам өөрөө хийсэн бяслаг, таргаа тухайн нутгийн найзуудтайгаа хуваалцдаг. Найзууд маань маш зочломтгой, эетэй байдаг гэж Сагин Сайламын ярихыг үргэлжлүүлэн сонсоорой.

“Маш зочломтгой зантай, хүндэтгэлтэй ханддагт нь би их баярладаг. Гаднаас ирсэн өөр нутгийн хүн болон гадаад хүмүүсийг онцгой халамжлан тусалдаг. Гэлэшаний тариаланчдын хувьд сургууль соёлын мөр хөөгөөгүй нь олон. Гэхдээ намайг очих бүрт маш элгэмсэг найрсгаар гэртээ урьж дайлдаг. Өөрсийнхөө тарьсан хүнсний ногооноосоо бэлэглэдэг. Зочломтгой найрсаг зан нь ерөөсөө удаан жилийн уламжлал байсныг би ойлголоо. Үүнийг ямар нэг их сургуульд сурч, цол зэрэг хамгаалсанаар олж авах зүйл биш юм”.